هرات ولایت دافغانستان په لویدیځ کې موقعیت لري ، چې شمال ته یي ګاونډی هیواد ترکمنستان ، لویدیځ ته یې ګاونډی ایران جنوب ته یې فراه او ختیځ ته یې غور او بادغیس ولایات پراته دي .

دهرات ولایت مساحت ۵۴۷۷۸ مربع کیلومتره او نفوس یې دوروستیو شمیرنو له مخې تر یونیم ملیون زیات اټکل شوی دی .

هرات ولایت چې دافغانستان له سترو ولایاتو څخه دی ،په مرکز سربیره پنځلس ولسوالۍ لري چې نومونه یې په لاندې ډول دي .

انجیل ، ګذره ، کرخ ، کشک کهنه ، رباط سنګي ، ګلران ، کوهسان ، غوریان ، زنده جان ، ادرسکن ، شینډنډ ، اوبې ، پښتون زرغون ، فارسي ، چشت شریف

داځل مو ددې ولایت له جهادي مسؤل حاجي عبدالرحمن سره مرکه کړې ده چې ستاسو پام ورته راګرځوو .

پوښتنه

محترم حاجي صاحب که له هرڅه وړاندې زموږ لوستونکو ته ځان وروپیژنئ ؟

ځواب

زما نوم حاجي عبدالرحمن دی ، دفراه ولایت دبکوا ولسوالۍ اوسیدونکی یم ، د اسلامي امارت دواکمنۍ په دوران کې مې په مختلفو نظامي جبهاتو کې جهادي خدمت سرته رسولی ، کله چې امریکایي یرغلګرو په افغانستان یرغل وکړ او په نتیجه کې یې داسلامي امارت واکمني سقوط وکړ ، زه او دفراه ولایت تکړه مجاهد مولوي باز محمد لومړني کسان وو چې په فراه ولایت کې مو دیرغلګرو په خلاف جهاد پیل کړ او عملا مو په دښمن بریدونه پیل کړل ، دامریکا په خلاف په تیر دوولس کلن جهاد کې مې مختلف مسؤلیتونه سرته رسولي ، په دې لړ کې مې دفراه ولایت دولایتي کمیسیون دمشرتوب ، دبکوا جهادي مسؤلیت ، د بالابلوک ولسوالۍ مسؤلیت اودنیمروز ولایت دجهادي مسؤلیت وظایف سرته رسولي او له تیرو شپږو میاشتو راهیسې دهرات ولایت دجهادي مسؤل په حیث جهادي خدمت ترسره کوم .

پوښتنه

محترم حاجي صاحب ! که دهرات ولایت دجهادي حالاتو په اړه معلومات راسره شریک کړئ ؟

ځواب

په هرات ولایت ولایت کې لله الحمد جهادي کارونه له تمې سره سم پرمخ درومي ، سره له دې چې دښمن ډیره هڅه کړ ېده او دمنفي تبلیغاتو لړۍ یې هم روانه ساتلې ده ، خو له دې سره سره په هرات کې مجاهدین هره شیبه دقوت په حال کې دي .

دهرات په ټولو ولسوالیو کې مجاهدین شتون لري ، زه خپله چې تیرې څو میاشتې دهرات په جبهاتو کې وم او دصحنو شاهد پاته شوی یم ، مجاهدین لله الحمد په ښه حالت کې وو ، دهرات دزیاتره ولسوالیو تر ۷۰فیصده زیاته اراضي دمجاهدینو تر کنترول لاندې ده ، یوازې د هرات ښار په ختیځو ولسوالیو لکه ګذره ، پشتون زرغون او انجیل کې یو لړ مشکلات شته ، چې حکومت یو لړ اربکیان جوړ کړي دي ، نورې سیمې الحمدالله دمجاهدینو دقوت سیمې دي .

پوښتنه

په هرات ولایت کې یوه کلیدي سیمه ددې ولایت شینډنډ ولسوالي دي ، چې هلته دامریکایانو خورا ستره هوایي پوځي اډه هم شته ، او امریکایانو ددې سیمې دکنترول لپاره په تیرو لسوکلونو کې خورا ډیرې هڅې او عملیات ترسره کړي دي ، که ددې سیمې په اړه معلومات راکړئ ، چې اوس په کې حالات څرنګه دي ؟

ځواب

شینډنډ رښتیا هم یوه مهمه سیمه ده ، نه یوازې داچې هلته دامریکایانو ستره هوایي اډه او روزنیز مراکز شته بلکې له دې ځایه دافغانستان دجنوب په خوا لویه لار هم تیره شوې ده .

په تیرو څو کلونو کې دشینډنډ د اشغال لپاره خارجیانو او داخلي غلامانو یې خورا ډیرهڅې او ظالمانه عملیات ترسره کړل ، چې څوځله خو یې دعزیزاباد دپیښې غوندې قتل عامونه هم ترسره کړل ، په وروستیو څو کلونو کې امریکایانو په دې سیمه کې خپل پوځي حضور خورا زیات کړ ، ګڼ شمیر پوستې اوقرارګاو ې یې جوړې کړي او ګڼ شمیر ټوپکوال یې داربکیانو په توګه وګمارل .

مګر لله الحمد له دې سیمې دامریکایانو له تیښتې وروسته سږ کال دخالدبن ولید عملیاتو په لړ کې یوځل بیا هرڅه بدل شوي دي او دامریکایانو خوارۍ په اوبو لاهو شوي دي .

شینډنډ چې پخوا یې ډیره برخه ددښمن ترسلطه لاندې راغلې وه اوس یې تر اتیا فیصده ډیره برخه دمجاهدینو ترواک لاندې ده ، ددښمن حضور یوازې دولسوالۍ مرکز او میدان هوایي ته نږدې او دلویې لارې په سر راټول دی

دشینډنډ مرکزي او مهمه سیمه دزیرکوه ګڼ میشته سیمه ده ، په دې سیمه کې پخوا داربکیانو ۲۴ پوستې موجودې وې ، مګر دخالد بن ولید عملیاتو له پیل وروسته مجاهدینو ځیني اربکیان ددعوت له لارې را اړولي دي او ډيرې پوستې یې دجنګ په واسطه له منځه وړي دي ، چې اوس مجموعا ۲۲پوستې له منځه تللي او یوازې دوه پاته دي ، دغه راز د پولیسو او اردو هم ډیرې پوستې له منځه تللي دي ، دغه سیمه چې یو وخت مجاهدینو په کې چریکي عملیات کول ، اوس دمجاهدینو په ستر مرکز بدله شوې ده او علنا په کې خپل جهادي کارونه ترسره کوي .

باید ووایو چې ددې سیمې په ازادولو کې دنظامي مجاهدینو ترڅنګ ددعوت او ارشاد کمیسیون هم ستر رول اداء کړی دی او ډیر شمیر هغه کسان چې پخوا یې ددښمن په صف کې وظیفه اجراء کوله دخپلې مؤثرې برنامې په توسط یې له مخالفت څخه اړولي دي .

پوښتنه

تاسو وویل چې دخارجي عسکرو له وتلو وروسته مجاهدینو هغه سیمې بیرته فتحه کړي چې پخوا دښمن نیولې وې ، آیا دداډول سیمې دبیرته نیولو لپاره دښمن کوم عملیات نه دي ترسره کړي ؟

ځواب

دښمن یوځل بیا خپل زور کارولی دی خو نتیجه یې نه ده ورکړې ، دبیلګې په توګه دزیرکوه دبیرته نیولو لپاره دښمن دوه ځله خورا ستره عملیات ترسره کړل ، چې حتی چورلکې ، بې پیلوټه طیارې او جنګي جټ طیارې یې هم به کې وکارولې ، مګر پرته له دې چې دښمن ته زیان اوښتی بله نتیجه یې نه ده ورکړې ، په هغه عملیاتو کې چې دنومبر میاشتې په مابین کې ددښمن لخوا په دې سیمه ترسره شول ددښمن ۴ټانګونه په ماینونو ختم شول ، یو ټانګ یې په راکټ وویشتل شو ، دغه راز یې پیاده عسکرو ته درنه مرګ ژوبله واوښته چې په نتیجه کې یې دښمن بیرته په تیښته اړ شو ، تردې وړاندې د ۲۰۱۳م کال داکتوبر په میاشت کې ددښمن لخوا په دې سیمه درانه عملیات ترسره شوي وو چې دښمن ته په کې دروند زیان اوښتی وو .

پوښتنه

محترم حاجي صاحب که دسږ کال خالد بن ولید عملیاتو په اړه معلومات راکړئ چې په هرات ولایت کې ددې عملیاتو مهمې لاسته راوړنې څه وې ، یعني هغه کوم معلوم نظامي یا ملکي بریالیتوبونه دي چې ددې عملیاتو په لړ کې ترلاسه شوي دي ؟

ځواب

دخالد بن ولید عملیاتو له پیل راهیسې موږ ددرست افغانستان غوندې په هرات کې هم مهم بریالیتوبونه درلودل ، په دې کال کې دشینډنډ غوندې دهرات زیاتره هغه سیمې چې خارجی یرغلګرو په ډیر ظلم سره لاندې کړي وې او پخوا دمجاهدینو عملیات په کې کمزوري وو ، بیرته په جهادي سیمو اوښتي او ددښمن دواک لمن ورټوله شوي ده .

په دې لړ کې دهرات په لراوبر کې په لسګونو پوستې دمجاهدینو په بریدونو فتحه شوي او له منځه تللي دي ، ددښمن دپوستو دفتحه کولو پیښې دهرات په ټولو ولسوالیو کې ترسره شوي دي ، چې ډير ځله مجاهدینو ته غنیمتونه هم په لاس ورغلي دي .

دهرات په لویو لارو ددښمن په اکمالاتي کتارونو باندې مکررا عملیات ترسره شوي دي ، چې دښمن ته په کې درانه تلفات اوښتي ، دغه راز لکه وړاندې چې وویل شول چې په شینډنډ کې دوه ځله ددښمن لوی عملیات په شا تمبول شوي او درنه تلفات ورته اړول شوي دي .

په هرات ولایت کې دسږکال یوه لویه بریا داوه چې ګڼ شمیر هغه کسان چې ددښمن په لیکو کې ولاړ وو ، ددښمن له صف څخه راوتلی او خپلې وسلې یې مجاهدینو ته سپارلي دي ، په دې لړ کې هرات یو له هغه ولایاتو څخه دی چې دغه بهیر په کې ډیر ګړندی او مشهود دی .

په دې بهیر کې ځیني داسې پیښې هم شوي دي چې ددښمن افرادو دحقیقت په درک کولو سره خپل دپوستې ملګري عسکر وژلی وي او بیا له وسلو سره مجاهدینو ته راغلی وي ، څه موده وړاندې دپهلوان په نامه یو عسکر خپل دپوستې ملګري ووژل ۲ثقیل ماشیندار او نورې سپکې وسلې یې له ځان سره راوړې او مجاهدینو ته وسپارلې ، همدا تیره اونۍ دشینډنډ په زیرکوه کې د رحمت الله په نامه یوه عسکر یو رینجر موټر ، ۲ثقیلان ، ۳کلاشینکوف او ۳مخابرې له ځان سره راوړې او مجاهدینو ته یې وسپارلې ، دغه ډول پیښو ددښمن په لیکو کې بې اعتمادي او وارخطایي زیاته کړې ده ، او امید شته چې ددعوت او ارشاد کارونه به نور هم مؤثر شي .

په هرات کې سږکال ددښمن یو شمیر دمتوسطې کچې مشران هم له منځه تللي دي ، په دې لړ کې دکرخ په ولسوالۍ کې ددښمن یو استخباراتي فعال احمدلي چې دکرزي دامنیتي مشاور ډاکټر سپنتا ورور وو هم دمجاهدینو په چریکي برید کې له منځه لاړ .

په هرات ولایت کې سږکال یوه بله جالبه پیښه او جهادي بریا ددشینډنډ ولسوالۍ په زاول سیمه کې پیښه شوه په دې علاقه کې چې امریکایي او داخلي عسکر پوځي روزنیز مرکز لري ، مرکز ته په نږدې سیمو کې تمرینات ترسره کوي ، دلته د تبخسر په نامه یو غر دی ، چې په سر یې همیشه دښمن چورلکې کینولې او عسکر به یې دتمریناتو لپاره پیاده کول ، بالاخره مجاهدینو په ځانګړي تاکتیک سره همدغه داچورلکو دکیناستلو ځای په په چاودیدونکو موادو فرش کړ ، او کله چې چورلکه ورباندې کیناستله دروند انفجار رامنځته شو ، چې په نتیجه کې چورلکه له سپرو عسکرو سره له منځه لاړه .

دا مې مختصرا هغه مهمې پیښې یادې کړې چې سږکال په هرات ولایت کې پیښې شوي دي دزیات تفصیل لپاره کولای شئ دالاماره ویب پاڼې خبري ارشیف وګورئ .

پوښتنه

محترم حاجي تاسو په وروستیو څو میاشتو کې دهرات په ولایت کې مهم مصروفیتونه او له مختلفو سیمو لیدنې کتنې مو درلودلې ، که په دې اړه خپل معلومات راسره شریک کړئ ؟

ځواب

په وروستیو دوو میاشتو کې زه دهرات ولایت له ټولو ولسوالیو څخه په لیدنو کتنو بوخت وم ، په دې لړ کې ما دهرات ټولو ولسوالیو ته سفرونه وکړل یوازې کرخ ولسوالۍ ته دمسافې داوږد والي له امله لا نه ړم ، دغه راز مې دپښتون زرغون ولسوالۍ څخه لیدنه ونه شوه ، له دې دوو سیمو ماسوا په نورو سیمو وګرځیدلو ، له مجاهدینو او سیمیزو مخورو سره مو لیدل کتل وشول ، او ددوی ستونزې مو واوریدې .

په هرات ولایت کې پخوا داسې تشویش موجود وو ، چې دتورن اسمعیل خان لخوا په ګڼ مقدار وسلې ویشل شوي دي او شاید په اطرافي سیمو کې مجاهدینو ته مشکلات جوړ کړي ، خو موږ چې په ټولو سیمو وګرځیدو ، جهاد او مجاهدینو ته هیڅ خطر موجود نه وو او نه هم دموضوع واقعیت داسې وو لکه پخوا چې اوازه وه ، دهرات اولس له مجاهدینو سره نږدې روابط او قوي ملاتړ درلود ، او په ټولو سیمو کې دمجاهدینو ولسي ملاتړ مخ په زیاتیدو وو .

ـــ محترم حاجي صاحب مننه چې له موږ سره مرکې ته حاضر شوئ

ـــ له تاسو هم ډیره ډیره مننه